قصيدةقانون الوحده| موقع شعراء للشعر والقصائد .. Shuaraa

Google+
العودة إلى كل القصائد
طباعة القصيدة


قانون الوحده

في قانون الوحده
كلنا بنضعف بالليل
مع اول خبطه للذكريات ف الحيط
مع اول مواجهه مع روحك
مع ضعفك وسط جروحك
مع صوت وجعك المكتوم
وجرحك اللي ملمش بالوقت
مع خوفك من بكره الجاي
والماضي اللي مفارقكش
مع اول نظره علي خسايرك
وتعداد اوجاعك ودموعك
مع شوفتك كام واحد باعك ببلاش
والخوف ف عيونك
متخباش
والدمعه المحبوسه تملي
وكلام جواك عمره ما اتقال
كلنا عندنا شيء بيوجعنا
ان حد قرب من ملامحنا
بيشوف تجاعيدنا ناس سابوا
ويشوف عينينا الدبلانه
واللمعه المطفيه غياب
كلنا في اسم ف حياتنا
ان حد نطقه قدامنا ولو صدفه
فجأه ضحكتنا بتقلب بعياط
كلنا عندنا جزء ف قلبنا
مكتوب عليه
مغلق للتحسينات
بتعدي سنين ومبيتحسنش
يتحسن ازاي طيب
وانت يامسكين رافض اصلا تاخدله علاج
الجرح كبير
ولا صحيح الهوي غلاب
خليني صريح
حزنك قابل للإدمان
والحزن انواع
في حزن بيضعف ويكتف
ويدمر روحك بالتدريج
وحزن علي قد ما يتعب بيقويك
بيطلع الاجمل فيك
وبتخرج منه شخص جديد
بس انت حزين
والحزن بتاعك حاله نادره
نوع مش موجود ف الحالتين
هتعيش موجوع ومداري
تضحك والضحكه مصاحباها دموع
ومفيش ولا دوا راح يشفيك
من امتي الحزن كان عالجه دكتور
دكتورك باعك من بدري
دكتورك الناس اللي سابوك
الدوا م الداء ودائك اشخاص
فمفيش ولا علاج ينفع
اذا كان دوا ولا اقراص
محتاج نوع تاني من العلاجات
اقراص مطحون فيها صوت اللي باعوك
حقنه متعبيه ريحتهم
وازازه دوا فيها كلامهم....فيها وعودهم
انت علاجك ف اللي خانوك
فكفايا تضييع ف فلوس
علي عيادات الدكاتره النفسيين
وسفرك بره علشان ترتاح
قال يعني راحتك ف البعد عن البني آدمين
صدقني البعد مهواش حل
الوحده سلاح ذو حدين
فيها راحه من الدنيا ودوشتهاو م الزحمه
لكن بتموت لو بالليل
وقت الاوجاع والضعف يبان
والحزن يبان ع المكشوف
كل اللي خانوك كل اللي باعوك
كل اللي سابوك وقت الخوف
كانوا م الاول اصلا مش ليك
انت اللي عبيط
ازاي تتعلق باللي يروح
ازاي كدبت احساسك مليون مره
وغمضت عنيك
نطيت ف البحر بإسم الحب
وانت اساسا جاهل بالعوم
اللي نطيت فيه مطلعش البحر
طلع امتداد الموج
غمضت ونطيت ع الشط
فلما وقعت
نزلت بقلبك ع الارض
الغلطه من الاول عندك مش عند البحر
الحب دا ذنب
ياتوب منه توبه نصوحه بدون عوده
يا تعيش عمرك كله بتذنب
من غير توبه
و اما تموت.... هتخش الجنه
من امتي في ناس بتسمعنا
من امتي اتحققت احلامنا
الدنيا متاهه
والفرقه جرح بيوجعنا
خلينا واضحين
جرحك سببه البني آدمين
انت حزين
والدنيا بتقلب اسود غامق ف عنيك
حبرك الوان
والضعف يبان
والحزن المتشال جواك
بيطلع علي وشك بالليل
خليك بعيد اياك ترجع
الرجعه معناه نهايتك
لسه في باقي ف حكايتك
حدوتك مش ممكن تخلص دلوقتي
حدوتك فيها بقيه
الدنيا هتديك تاني جرح واوجاع
كل اللي خسرته وسابك
هيلف تاني ويرجعلك
بس اما يجيلك
هتكون قربت خلاص تنساه

ولاء أشرف
26,يونيو,2018


الكلمات الدليلية: قانون, الوحده,




التقييم = 0 %


التعليقات

يُسمح لجميع الأعضاء التعليق هنا.. وإذا كنت غير مسجل لدينا فضلاً إنقر هنا للوصول الى صفحة التسجيل